爆爆離家出走了

心情差到極點，我養左八年佢地，從未試過走雀，做乜尋晚早瞓左就搞成咁？！

 

我最後一句同爆爆講的野，就係下午問佢係咪呢排同潮潮吵大鑊，點解潮潮最近痴塊布都唔痴你？！爆爆當時很不忿，嬲嬲地，仲噴哂氣。

應該呢d說話太么心么肺，所以爆爆先特登離家出走吧......佢同潮潮唔知做乜，潮潮最近唔痴佢，唔肯同佢同一個籠，寧願同叻叻一齊，所以爆爆傷心地退出呢段三角關係，黯然離開……

尋晚中秋做節食飯，開冷氣所以放雞雞出來，我尋日好早瞓左，我瞓到半夜，聽到雞雞勁叫應該未蓋籠布，老公出去睇，就見到雞雞個籠門關哂，只有爆爆在籠外，爆爆不嬲都唔識自己入返籠，老公一行近，爆爆飛左去氣窗，就捐左出去走埋！！

只可以講各有責任，奶奶今朝同我say sorry，我忍唔住勁喊，我受唔起句sorry，我覺得大家各有責任，我無怪邊個，唔應該要奶奶say sorry，我地開籠門俾雞雞伸展下但一食完飯就瞓左，老爺關籠門無為意爆爆無入籠，奶奶關冷氣後開左氣窗，半夜老公蓋籠布嚇到爆爆飛近窗，爆爆自己見窗有隙就自己捐左出去，所以我老爺奶奶老公同爆爆自己都各有責任……

估唔到我都有貼尋雀告示的一日。