唐氏症篩檢

今日要去屯門醫院做唐氏症篩檢，以往都係一些高齡產婦先要做的篩檢，但而家所有孕婦都可以參與篩檢了。

其實篩檢主要看年齡、度頸皮同抽血去睇懷唐氏兒的機率，結果只可以顯示高風險同低風險，如果係低風險呢就無下文，如果係高風險呢，兩個星期內就會收到電話通知，政府醫院就會再安排做抽絨毛或者抽胎水去進一步確實係咪真係唐氏兒，但呢種穿刺方式就會有1%流產風險，不但係就算係低風險都唔代表一定生出黎無事，要確實就一定要抽絨毛或者抽胎水（喺政府度做）或者去中大做無風險的t21（自費）。

其實之前同老公商量過，我覺得低風險就乜都唔駛做，其實我地都後生，兩個又唔煙唔酒，懷唐氏兒的機率真係好低，無謂嘥d無謂錢啦，但係老公話唔可以放過任何可能性，無論篩檢結果係高風險同低風險，都要自費做t21，買個安心wor~~咁如果係咪都做t21，咁其實唔做篩檢都得ga la~~

之但係，做篩檢有得照超聲波wor，喺政府醫院照唔駛錢wor~~咁就梗係等水吧水母又湊我去做篩檢，順便近近地同佢地睇下超聲波la（平時去銅鑼灣照超聲波，費事兩老去咁遠la~~）

去到聽到悶到嘔的講座，其實都係睇電視only，之後就係今日的戲肉la，不過入去照時姑娘話只肯一位陪同，而且除了先生外，唔歡迎其他男士在場wor，所以水母就好榮幸咁入去陪我啦，我都有少少唔好意思，問佐姑娘兩次可唔可以俾老爺入埋黎，但係唔得就係唔得，咁唯有對唔住水吧一次啦~~姑娘仲講到明，照超聲波果陣，唔準問男仔定女仔，唔準問正唔正常，因為得果三個月，係睇唔到ge，而且場內不準拍攝同攝影，更加唔會有超聲波相俾返我tim~~可能呢幾年去開睇私家，哈哈，起碼無老師訓話學生的感覺，所以有d唔慣。

見到bb，水母好興奮啊，bb手仔腳仔都長齊啦，都似返個人，頭部比例較大，見到頭、鼻、下巴，成個羅茲威爾外星人咁樣，聽講超聲波係有bb聽到音頻的，所以一照超聲波bb多數都會特別煩躁，今日超到阿b郁得好勁。今日度到bb 5.5cm，頸皮1.5mm，一切正常，預產期都無偏差啊。

趁拎張超聲波圖去化驗時，順便偷影左張超聲波圖~~因為張圖係度頸皮用，大圖只顯示頸皮，阿b個外形就在紅色圈住的位置~~

不過同時，照到子宮有2cm的水囊，姑娘話因為荷爾蒙的影響，都係正常，會隨時日慢慢收細，不過要mon住咁囉，排期下個月再照個水囊。我唔擔心個水囊啊，反正我個瘤9x11cm都陀佐咁耐啦（我仲係覺得係個人的豐功偉跡，哈哈，激死老公）~~不過一個月後又可以去照下阿b啦~~

呢個世界，有好野，梗係有唔好野啦，見完bb俾完幸福的感覺我，就要去抽血啦，呢個時候我就抱怨老公，如果係咪都做t21，咁其實唔做篩檢都得ga la，咁就唔駛抽多次血……