Week 6 la~~ 照超聲波、睇中醫安胎

咁就Week 6 la~~呢排瞓覺好易醒，聽覺好靈敏，成日臨天光就俾d雀仔嘈醒，個樣就攰d殘d law……

 

本來約佐聽日見林醫生的，不過今朝返工，地鐵好鬼焗，返到公司作嘔作悶，非常唔舒服，打俾林醫生話今日中午有位，即刻放sick去睇醫生。

一離開公司就身心舒泰。阿b，你唔可以咁ga，搞到我無佐份工呢，你第時就同我一齊喺街乞食ga la~~

林文英醫生係我好鐘意的醫生，年半前做子宮肌瘤切除已經睇佢，一直follow up到而家。最主要佢係一個女醫生，我一向較鐘意睇女醫生，尤其婦科呢d咁私人的部位，而且佢係我見過的醫生最溫柔細心，最有醫德的醫生，佢診症時唔趕唔急，照ultra sound時如果你睇唔清楚佢會再碌多次俾你睇，再詳細解釋，仲好記得喺手術室入便，佢話佢係林醫生，問我認唔認得佢，我仲講笑話︰「戴住口罩好難認wor~~」，佢即刻拉低個口罩︰「咁認得啦，哈哈~~」

除左醫生好之外，蔡姑娘都係一個非常有經驗的姑娘，好多時在電話問佢都會好有耐心咁解釋。所以一有bb時，老公二話不說話一定要搵返林醫生，亦都唔駛周圍格醫生價，總之就係林醫生。

後來我上網check過林醫生，佢真係好呯如潮的，遇到一個好醫生，真係我的福氣。想當初知道有子宮瘤時，亦都睇過另一個非常名的婦科靳醫生，佢愛理不理，診症當日仲趕住走，當時我個瘤已經7x9cm咁大（一年前做婚前檢查時係無野，即係一年間個瘤長到咁大），佢只係答我要觀察下，三個月後再睇個情況點。著我三個月後再覆診（但三個月後我就結婚了），後來透過做護士的相熟朋友，佢所屬的私院就正正係果個醫生做果間，佢話果個醫生主要只接生仔（仲要係雙非），三個月內的期都爆哂；但睇完林醫生，真係天堂同地獄的分別，林醫生話個瘤可以觀察下，不過咁短時間之內長到咁大，真係不容忽視，最好都係儘快做，尤其呢d手術要睇醫院有無期、醫生有無期、仲要夾埋自己的經期，所以安排一個星期後做手術，仲俾蔡姑娘即刻book到st paul，林醫生仲安撫我，做完手術，三個月都夠，一定在婚禮前好得返，婚期無問題！！所以，我覺得林醫生除了照顧病人的生理，仲好識顧及病人的心理。

今日夾好老公在中午lunch time齊齊去見林醫生，始終第一次見bb，一齊去好d~~點知我早到佐成個鐘，而診所又無人，我俾醫生召見佐，introduction完佐之後，醫生叫我一齊去照超聲波，我尷尷尬尬話想等埋老公，林醫生都好nice話ok，睇佐其他client先，咁我就喺出便諗定d問題準備等陣一次過問林醫生，好在老公都極速到佐~~我地一齊入去睇ultra sound，由於只有6 week，所以只好照陰超，林醫生遮得好好，先入房準備好哂遮好哂先叫先生入黎，無咁尷尬，整完都係叫先生出去先。

今次bb只有2.8mm咁大，真係細過一粒豆呀~~老公話見到閃閃的心跳，但我近視又無戴眼鏡，咩都見唔到，又唔好意思問wor，好在林醫生錄佐dvd，遲d可以慢慢睇返la~~我以為見到bb心跳就叫完成任務ga ka，個個blog友網友都係講照閃閃之ma，原來細心的林醫生仲會睇埋子宮位置、厚度、著床位置等等，好在我一切正常，林醫生仲check到我今次右邊卵巢有排卵，所以著床係靠右邊，左邊無排卵，所以得一個肧胎。

林醫生在st paul同養和都有聯繫，價錢一樣，我自己就鐘意st paul多d，貪方便同就腳，始終六日五夜咁耐，可以方便大家睇我，但係林醫生話養和配套好d，老公就覺得最好d設備醫生用得就手d、方便醫生會好d，不過網上的評語都係養和好d，但係又易full，最後我都book佐養和先，姑娘話一日未落deposit一日都可以轉~~

就係興奮沖昏頭腦，我好似一d唔舒服都無。同老公lunch完就好開心咁返屋企la，又好興奮同奶奶報告la~~跟住連隨book埋中醫遲醫師，不過遲醫師聽日full哂，但今日下午有位，所以我即刻又去佐葵芳la~~

遲興毅醫師係iris介紹的。做完手術後，經期不穩，上年七八九月生活太緊張就三個月都唔黎，最後去搵林醫生開通經藥，但係之後十月果陣就一個月黎佐三次，咁啱林醫生果排放大假，iris就提議我不妨睇下中醫調理下，佢介紹佐兩個醫師俾我，一個在佐敦，另一個就係遲醫師。我由細到大都唔睇中醫ge，但老公好信中醫，話覺得西藥多副作用，喺佢的堅持下，我最後揀佐遲醫師，因為覺得去葵芳比較近我，哈哈~~遲醫師一聽我病歷，就催我快d生bb，但呢d野唔係話有就有ga ma，有都唔駛搵佢啦，哈哈~~經期不穩係一個問題，而cycle長就係另一個問題，正常人應該廿八日一個cycle，但我正常的日子就35-42日一個cycle，即係話，人地一年有12次機會受孕，我係正常的話一年都係得8次，遇著好似上次咁三個月都唔黎一次，咁我一年的機會真係可能五隻手指都數得哂，而呢5次入便我又未必次次排卵，所以成孕難上加難。我覺得自己好有問題ga，不過遲醫生第一次把脈又無講我咩，話我身體ok wor，第一次睇完就開佐鼻屎咁的助孕丸俾我。叫我下次經期第一日就再去，我梗係開心死啦，如果睇呢個醫生日日食呢d鼻屎唔駛食中藥，你話幾好呢。但殘酷的現實係，第二次去見佢，佢開佐十二日中藥俾我，要早晚日日飲，初時仲接受到，但日日飲同一隻味的野真係好難頂，仲要用薑水浸腳，不過雖然果次個cycle無中奬，但我覺得身體好佐，食佐佢的藥之後，成個冬天唔再怕凍，以前十八度以下要著羽絨ga ma，今年就好佐好多啦，已經唔駛著羽絨。亦由於果次無中奬，我又苦口苦面咁去見遲醫師，佢話乜你咁渣ga，話我漯，又開返上次果帖中藥方俾我，同一隻味，又係早晚日日飲，飲足十二日，真係飲到我喊咁滯，我見好多網友寫佢地通常要調理半年左右，我就同水母講，今次有就有，無就停一排唔食中藥住，再食落去我就真係會死。最後上天應我所求，今個cycle就bingo，唔駛再食中藥la。等我非常高興唔駛食中藥的時候，老公大人都想我繼續睇中醫，話要安胎wor，咁又係ge，咁難得中佐，唔通唔安胎咩，有咩事就真係又要飲過果d好難飲的中藥ga la，咁我今次又死死地氣去見遲醫師。

好在老公今日在附近見客，而遲醫師又多客，所以老公大人趕得切陪我一齊見醫師。

一見醫師，即刻讚下醫師，佢check下我睇佐3次咋wor，就已經好開心，跟住就成個細路仔咁把脈估性別，佢話八成係男仔wor~~其實男仔同女仔都無所謂，我知道水母水吧鐘意女仔多d，話女仔顧家d wor，但之前紫微斗數都各自話我同walter有兩個仔，所以心裡都覺得係仔仔多，至於老公梗係鐘意仔多d la，醫師開佐七日安胎藥俾我，仲安撫我話今次果d應該無咁難飲，不過呢就要戒口，唔可以食生冷野~~

不過聽講中醫頭兩個月都係唔準的，三個月後把脈把性別應該會準d~~所以，期待下個月再見遲醫師啊~~

爸爸都話中醫好犀利啊，咁早就把到性別，我自己就覺得遲醫師特別犀利~~