勁出血

之前雀友話hoic送俾我個籠太細（15吋），對豆豆來講，連翼仔都唔能舒展。咁又係ge，之前個籠，掛埋玩具，豆豆行來行去都碰撞到，都於是我就想換過個籠。

而且有個大d的籠，又可以放多d玩具，我成日都擔心豆豆日頭會好悶好寂寞~~（雖然水吧水母會同佢玩，又有生果比佢食~~）

揀個籠都揀佐好耐，我鐘意兩層型，上層可以放豆豆，下層雞雞就可以四隻住埋一齊，唔駛再分開，而且中間的間隔可以拆開，將兩個籠合併成一個大籠tim，如果搬屋有位的話，豆豆可以獨霸成個籠tim~~不過水母同大人都唔想個籠咁高，成個屏風咁擋住d風同視線~~

雖然佢地唔俾我向高空發展，不過佢地都ok俾我打橫發展，可以買個大小小的籠！！

好在最近雀仔街返返好多籠（之前的籠缺貨缺左成年），於是特登我放假而老公又返工的今日去揀籠，費事佢又依依哦哦呢樣唔俾果樣唔好。仲要咁啱鸚鵡店做緊christmas promotion，玩具全線7折、用品8折，買滿300仲有DIY玩具送，真係抵到爛~~

終於都買佐成堆野返屋企，但結果係因為無老公喺身邊幫手拎野，我自己一個拎到成隻手勁痠痛~~當然，除了豆豆的用品之外，雞雞都有份ga~~

豆豆一路睇住我裝個籠，不過佢似乎鐘意個舊籠多d，佢不停走返去個舊籠度，可能細細個迫迫地多d安全感掛~~

18吋籠（其實我之前想買20吋籠，但老公大人大力反對），雖然長同濶比之前果個多佐3吋，但淨計面積已經比之前果個大44%，仲未計呢個籠仲比之前高50%呢~~，一放豆豆入去，即刻好似豪宅咁，等我之前仲擔心18吋籠唔夠大~~豆豆都係驚驚地，只係痴住個糧兜~~

掛埋玩具、千秋，我都覺得好正，最鐘意個覓食玩具（$50 再7折，好抵抵抵抵抵啊！！），我再加多個膝球，插滿瓜子、果仁，希望用食物引到佢鐘意留喺個籠啦~~

今日買得最貴貴就係呢枝磨爪棍（$ 158再8折），本來買豆豆時都在妹姐度求其買佐枝磨爪棍，但呢枝就粗d，佢企住瞓時可以放鬆腳仔，而且一面磨平左，磨爪得黎都唔會磨到腳仔，不過我就俾老公話我亂買野囉~~