醫院day 2

尋晚係呢幾日以來瞓得最最最好的了，今朝好早起床去梳洗了，因為之後坐月一個月，真係可能無得洗頭沖涼~~

影呢張相果陣，仲有一個鐘左右就會見到小水瓜啦~~因為前幾日痛到七彩，無影臨生前的大肚相tim，呢張就真係最最最後一張同小水瓜的合體照啦~~

沖完涼，好快老公就黎佐，仲幫我吹頭tim，我地一齊落去手術室，我的心情好平靜，無特別的緊張同興奮，因為尋晚粒panadol的藥力漸漸散退，我的小腹又開始非常痛，我只想快d入手術室，快d落麻醉，咁我就唔會再肚痛了。

當然我要單獨在等候區等等等，等姑娘再三核對資料，等林醫生briefing，等麻醉歐陽醫生briefing，我已經痛到要打側瞓先舒緩到小腹痛。

同一時間，老公被安排入另一間房著保護衣物，之後在走廊等安排入手術室，老公話等佐好耐，而養和的姑娘好好，會過去同佢吹下水陪下佢。

等佐好耐，我終於被推入手術室，今次過床比上次好，手術枱係有皮墊的，瞓喺度無咁凍，姑娘仲即刻拎著熱過的被被俾我蓋住，唔會好似上次st paul咁，手術床係張冷冰冰的的不锈鋼枱，凍鬼死我。今次在左手前臂落豆豆，支針比較粗所以好痛，然後弓身落局部麻醉再落半身麻醉，支針比豆豆果支幼好多，所以比想像中無咁痛，右手就被綁住接血壓計，好快左腳就少少痺痺地，歐陽醫生較側張手術床，好快d藥就過埋落右腳，歐陽醫生叫我抬高雙腳，但我已經半身郁唔到了，之後要插尿喉，無覺得痛，只係好似有條羽毛喺度掃下掃下咁。好快d麻醉藥上到心口，我即時想作嘔，歐陽醫生較高少少個床頭，就無哂想嘔的感覺了。

林醫生即刻試一試麻醉效果︰「你覺唔覺得我篤緊你呀？？」

我︰「無感覺喔~~」

林醫生笑著說︰「其實我已經拮佐你四下啦~~」

呢個時候，應該係對麻醉藥的反應，我全身都喺度震震震，牙較都震，老公被請佐入手術室，見到我係咁震，仲問我係咪太緊張。成個手術過程suppose老公係陪產陪住傾計等個老婆唔好咁緊張，但我真係震得太勁，連歐陽醫生都叫我唔好講野啦~~

其實陪產老公只可以坐喺床頭陪我，唔可以格開個擋布影下身，等我仲好期待可以影紀錄片咁影住個手術過程tim~~

大約過左十分鐘，林醫生叫歐陽醫生幫手大力一推，小水瓜就出佐黎啦~~老公當然唔放過果一刻啦，我見到好似好多血包住個bb咁，即刻另歪面唔敢睇~~當然姑娘即刻幫手做清潔~~

小水瓜一出世就喊喊喊，唔收聲，當姑娘放佢喺我床邊，可能我無佐陣痛同生產過程，其實感覺同被人質佐個公仔俾我無乜分別，我望住bb，感覺又好似好陌生，同bb講佐第一句說話︰「你好嘈呀！！」小水瓜竟然即刻收聲~~

就係咁，呢張就成為佐我地第一張全家幅啦~~

完佐之後，老公和小水瓜就被送走，姑娘話小水瓜要送上產科沖涼磅重等等，仲要瞓保暖箱三個鐘，而我就要留低多半個鐘被整理傷口聯針，同埋打抗生素。歐陽醫生話半身麻醉其實係有感覺，但只係無痛的感覺，但我自己對於成個過程就覺得有感覺但不是很大的感覺，有時被分散注意力後甚至覺得無感覺tim。之後我就被送到甦醒室等產科護士接返我上病房，其實大部份的醫生都會在朝早開刀，下午返診所應診，所以產科的護士喺朝早係勁勁勁忙的，我等佐成個鐘先有人接我，不過好在有個姑娘一直陪住我傾計等我無咁悶。

上到病房，老公應該等左我好耐耐耐啦，但我只係心急餵第一餐人奶，所以好心急要返小水瓜返返我身邊，唔知點解果一刻特別想痴住bb，於是call姑娘問下bb幾重同埋可唔可以送bb俾我，但姑娘勁勁勁忙，都未磅重，而且都繼續講話初生bb要瞓保暖箱三個鐘，咁我就再同老公傾下計啦，姑娘又黎下同我清潔整理同按肚加快子宮收縮同排出惡露。

等多一個鐘，又心急叫姑娘送返小水瓜俾我，第一下就急不及待要俾佢試第一口母乳了，由於有傷口，我只可以瞓喺度餵，姑娘好幫手教我同幫我，而第一口母乳係非常成功，關鍵在於bb擘大個口喊得最勁果陣就塞佢個頭個口埋身，小水瓜啜下停下啜下停下，姑娘話係正常的，因為要停低透氣ga ma~~

好在叫哂所有人下午兩點後先好黎，所以中午我地都有個寧靜的一家三口時間享受一下，大家分享了初為人父母的感受，對對方的關愛等等，我覺得這樣的安排很溫馨窩心。不過我仲未有信手抱初生bb，所以都由老公抱佢俾我~~ XDDD

傾左一陣，我就要休息啦，我發覺我同小水瓜的睡姿好似啊~~ XDDD

麻醉藥慢慢由心口開始散去，姑娘又黎第二次同我按肚助宮縮、排惡露，原來按肚係超超超級痛的喔，姑娘一路按按按，我一路推推推開佢，被佢按完我痛足幾個鐘tim~~

下午，爸媽姑姐姨姨、6299細佬舅父舅母都黎探我，小水瓜好乖好安靜瞓覺呢~~養和大力支持母乳，所以0800-2200都可以放bb喺病房床邊餵母乳，就係因為咁，所以個個黎到都可以抱下bb開心下~~

晚上終於可以吃粥水，我不太喜歡吃粥水，但老公說好好味~~

養和包三餐，通常今日點定聽日的食物，但聽日的早餐同午餐我都可以食粥水，但晚餐可以點菜了~~

我不捨得把小水瓜從我的身邊抱走，老公陪我陪到九點幾先走，仲幫我推埋bb車去育嬰房，今天真的辛苦爸爸了~~

雖然我都堅持餵哺母乳，但晚上嘛，還是留返俾醫院姑娘代勞好了，反正我可以08:00-22:00對住佢，實際夜晚都唔係要餵好多餐，都係俾自己好好休息好d。我選擇了illuma奶粉，因為朋友教路，illuma比較淡口味接近人奶，BB唔會因而唔肯食人奶，而且我也交代醫院要用杯餵，避免乳頭混淆，希望日後我可以做全母乳的媽媽la~~