Week 18

呢個幾個星期肥佐好多，連鎖骨都唔見埋，個個見到我都話我面圓佐，連我自己都覺得有d虎背熊腰，心口同背都勁厚肉！！

而且我發現一向無乜肉的腳肥到連腳趾隙都無埋，最近又鐘意著拖鞋多過密頭鞋，平時著開的鞋有一日竟然著到刮損腳，孕期未夠一半已經重佐10磅，手指戴結婚戒指都覺得有少少緊，真係不得不為自己的身型而打算啊！！

但今個星期，我發現，我的憂慮錯佐方向，我應該唔係肥（當然肥係必然ge，應該係可接受的範圍），而係水腫！！當我long高隻腳瞓喺度休息一陣時，我竟然重見我的腳趾隙！！當然，水腫比肥更加需要重視，雖然不是很嚴重的水腫，但這也反映了自己的腎功能變弱了，而且比我預期的來得早。

回顧過去的孕期，由於味覺變遲鈍，之前又受低血壓低血糖困擾，所以養成了多咸多甜的飲食習慣，最最最喜歡吃榨菜等醃製品（雖然都係間唔中食）和朱古力、糖、糖水，就連每天飲水都只係飲幾啖用來用supplement pills，平日的飲料都係果汁、朱古力、利賓納、蜂蜜綠茶、檸茶檸水、益力多，係最近開始飲埋鈣思寶。突然來的水腫，應該係對我的警示，希望我現在少咸可以為時未晚。

最近我仲做佐個實驗，發覺我一食materna，便便固之然深色佐，但其實我一食materna就輕瀉，食鈣片就會便秘，如果同一日又食materna & 鈣片，便便就係正常，不過我都唔鐘意吞pills，所以一日應該要食一粒materna、兩粒鈣片（分開三次食，醫生話吸收好d wor），但我好多時都係食materna、或者鈣片一粒、或者完全唔記得食（推下遲d推下遲d就無食了）。

不過今個星期瞓到半夜，伸佐個懶腰，右小腿就突然抽筋了，據聞抽筋係缺鈣的徵狀，咁我又要乖乖食supplement了。

小水瓜好像大佐好多，而家轉身唔再係一個小乒乓球，而係一個小橙的size，早三、四個星期已經無壓住bladder，但今個星期好似都開始頂住個胃，我食野少佐少少啊。今個星期繼續瞓多佐，又少佐感受小水瓜了，但小水瓜多數都好乖乖啊，好少轉來轉去，通常郁郁手郁郁腳自己玩，鐘意爸爸陪住，有爸爸摸住就特別安定呢。所以爸爸返工時，媽媽都成日有幫小水瓜同爸爸講︰「小水瓜掛住爸爸啊，爸爸要加油啊！！」

p.s.

好多朋友見到我寫的懷孕徵狀，都好擔心我，其實放心啦，我一直都唔係好辛苦，其實我算係無乜特別，正正路路，同懷孕前無乜分別的食得瞓得舒服型。

不過寫呢個blog，與其係同人分享，不如話其實係寫俾自己睇，因為而家科技發違，而我記性又差，有呢個blog我去睇醫生都同到醫生講呢期發生過咩事，哈哈，所以我經常都會睇返自己個blog，我係自己最忠實的fans啊！！

而且，本實體的孕媽媽日記，本來想留俾小水瓜做紀念的床前故事，因為第二三個月時經常臥床休息，而半途放棄佐了（又要寫野，貼相、超聲波、畫公仔等剪剪貼貼，都用幾多功夫ga，都係打字insert pic方便得多），所以更加要勤力寫blog，可以想像遲d小水瓜大個d，我拎住個tab同佢講佢喺肚裡面的故事，喺肚裡面爸爸媽媽已經好愛佢，順便都係一個好好的性教育啊！！